fréttir

Viðurkenning Jafnvægisvogarinnar fjórða árið í röð

12. október 2022

Vörður hefur hlotið viðurkenningu Jafnvægisvogarinnar 2022, fjórða árið í röð. Félag kvenna í atvinnulífinu, ásamt samstarfsaðilum úr forsætisráðuneytinu og viðskiptalífinu standa að hreyfiaflsverkefninu Jafnvægisvogin.

Jafnvægisvogin er viðurkenning til þeirra fyrirtækja og opinberu aðila sem unnið hafa að því markmið og náð árangri í að jafna kynjahlutfall í framkvæmdarstjórnum. Markmið þessa hreyfiafls er að árið 2027 verði kynjahlutfallið 40/60 í framkvæmdastjórnum fyrirtækja á Íslandi. Stór hluti þátttakenda sem skrifað hafa undir viljayfirlýsinguna hafa náð góðum árangri á þessu sviði og fjölgar þeim fyrirtækjum milli ára sem náð hafa markmiðinu og hljóta viðurkenningu. Í ár hlutu 59 fyrirtæki, 6 sveitarfélög og 11 opinberir aðilar viðurkenningu Jafnvægisvogarinnar.

Stefna Varðar er skýr í jafnréttismálum

Vörður hefur markvisst unnið að jafnrétti innan félagsins undanfarin ár og hefur einsett sér að vera til fyrirmyndar í jafnréttismálum í íslensku atvinnulífi. Vörður hefur frá árinu 2014 starfrækt jafnlaunakerfi og hlotið Gullmerki PCW, jafnlaunavottun VR og jafnlaunamerki velferðarráðuneytisins, fyrst fjármálafyrirtækja. Á síðasta ári hlaut Vörður Hvatningarverðlaun jafnréttismála með áherslu á kynjajafnrétti. Þá er félagið með hæstu einkunn á GemmaQ kynjakvarðanum sem greinir kynjahlutföll í leiðtogastörfum fyrirtækja á Íslandi.

„Vörður hefur á margan hátt verið brautryðjandi í jafnréttismálum hér á landi og hefur ekki gefið neinn afslátt af viðhorfum sínum og afstöðu þegar kemur að jafnfrétti. Við höfum í mörg ár haft skýra sýn og stefnu í málaflokknum sem hefur tryggt sanngirni, jöfn tækifæri og kjör alls starfsfólks. Reynsla okkar er að fjölbreytt samsetning mannauðs auki víðsýni, kalli fram ólík sjónarhorn og fjölbreytta nálgun verkefna, svo ekki sé talað um almenna gleði og ánægju.“ segir Guðmundur Jóhann Jónsson, forstjóri Varðar.

Framúrskarandi í jafnrétti

Vörður hefur hlotið Hvatningarverðlaun jafnréttismála 2021 með áherslu á kynjajafnrétti. Verðlaunin eru árlega veitt fyrirtæki sem stendur sig vel þegar kemur að jafnréttismálum og veitir öðrum innblástur til að gera slíkt hið sama.

author

Vörður tryggingar

12. október 2022

Deila Frétt