Helga Huld Bjarnadóttir er nýr þjónustustjóri þjónustustýringar hjá Verði tryggingum og hefur hún nú þegar hafið störf. Helga Huld kemur inn í stjórnendateymi Varðar á sviði þjónustu frá Icelandair þar sem hún starfaði frá árinu 2001 í fjölbreyttum störfum á sviði sölu og þjónustu. Nú síðast gegndi hún stöðu forstöðumanns þjónustuupplifunar og -Vildarklúbbs Icelandair. Í því starfi stýrði hún teymi sérfræðinga sem störfuðu með öllum deildum fyrirtækisins við að tryggja samræmda stefnu á sviði þjónustu og þjónustuþróunar.

Helga Huld lauk námi í BSc viðskiptafræði við Háskólann í Reykjavík með áherslu á vörustjórnun og BSc í rekstrarverkfræði frá sama skóla. Auk þess er hún með mastersgráðu í rekstrarverkfræði frá Tækniháskóla Danmerkur.

Í nýju starfi hjá Verði mun Helga Huld stýra þjónustuþróun og upplifun viðskiptavina, leiða og þróa samræmda þjónustu í öllum þjónustueiningum Varðar.

,,Við erum afar ánægð að fá Helgu Huld til liðs við teymið okkar hjá Verði. Hún býr yfir mikilli þekkingu og áralangri reynslu á sviði þjónustu og upplifun viðskiptavina. En það er eitt af okkar megin markmiðum hjá Verði að viðskiptavinir okkar upplifi að þeir séu ávallt númer eitt og að við einfaldlega förum fram úr þeirra væntingum í þjónustu,“ segir Hrefna Kristín Jónsdóttir, framkvæmdastjóri þjónustu hjá Verði tryggingum.