Djúp lægð nálgast landið úr suðvestri með ofsaveðri og hafa verið gefnar út appelsínugular veðurviðvaranir um landið allt annað kvöld og fram á þriðjudag. Reiknað er með suðaustan stormi eða roki, 20-28 m/s. Gera er ráð fyrir talsverðri rigningu eða snjókomu. Útlit er fyrir truflanir á samgöngum og líkur eru á foktjóni. Fólki ráðlagt að ganga frá lausum munum. Verktökum er bent á að ganga vel frá framkvæmdasvæðum.

Húsnæði og aðrar eignir    

• Gangið úr skugga um að þakplötur séu tryggilega festar, einnig þakrennur, grindverk og þess háttar.

• Heftið fok lausra muna utandyra. Trampólín, útihúsgögn, jólaskraut og grill fara gjarnan af stað í ofsaroki.

• Fullvissið ykkur um að öllum gluggum og hurðum sé tryggilega lokað.

• Fylgist með veðri og tilkynningum.

Ferðalög og mannamót

• Aflýsið ferðalögum og mannamótum og sendið ekki börn í skóla nema í samráði við skóla.

• Metið hvort ferðir út á land séu nauðsynlegar og hvort fresta eigi för vegna slæmrar veðurspár.

• Hlustið á tilkynningar og/eða viðvaranir sem kunna að vera gefnar í sjónvarpi eða útvarpi.

Upp­lýs­ing­ar má sjá á vef Veður­stof­unn­ar og Vega­gerðar­inn­ar. 

• Mundu ef þetta er neyðartilvik að hafa strax samband við 112.

• Ef ekki skaltu gera þær ráðstafanir, sem nauðsynlegar eru, til að draga úr tjóni sé þess nokkur kostur en farið jafnframt að öllu með gát.

• Þegar þú hefur brugðist við þá er næsta skref að tilkynna tjónið hjá okkur.

• Að senda myndir með tjónstilkynningu getur flýtt fyrir afgreiðslu.

• Mat á umfangi tjóns eða viðgerðar hefst ekki fyrr en veðrinu hefur slotað. Það þarf að vera óhætt fyrir almenning að vera á ferðinni svo að tjónaskoðunarmenn komist á staðinn.

• Eftir að tjón hefur verið tilkynnt hafa starfsmenn samband við fyrsta tækifæri til að hefja úrvinnslu málsins.

• Sé brýn neyð á aðstoð vegna tjóns bendum við á neyðarsímann 514 1099 sem opin er allan sólarhringinn.