Sjúkrakostnaðartrygging Innanlands
Upplýsingaskjal þetta tilgreinir einungis helstu atriði tryggingarinnar, s.s. hvað er innifalið og hvað ekki. Ekki er um að ræða tæmandi upptalningu né persónulegt yfirlit yfir tryggingar sem viðskiptavinir velja. Upplýsingaskjalið hefur ekki lagalega þýðingu og gegnir eingöngu þeim tilgangi að upplýsa viðskiptavini um helstu þætti tryggingarinnar. Tryggingayfirlit og nákvæmar upplýsingar um samningsskilmála sem gilda eru aðgengilegar á vátryggingarskírteini tryggingarinnar sem hægt er að nálgast á Mínum síðum Varðar. Skilmálar tryggingarinnar hafa að geyma tæmandi upplýsingar um vátryggingarverndina og eru hluti af samningi aðila ásamt vátryggingarskírteini.
Hvernig trygging er Sjúkrakostnaðartrygging Innanlands?
Sjúkrakostnaðartrygging Innanlands veitir sambærilega vernd og sjúkratryggingar samkvæmt lögum um almannatryggingar en er þó bundin ákveðnum takmörkunum. Tryggingin hentar útlendingum sem eru að flytja lögheimili til Íslands eða vinna tímabundið á landinu samkvæmt samþykktu dvalarleyfi Útlendingastofnunar. Hún hentar einnig Íslendingum sem eru að flytja aftur heim eftir að hafa flutt lögheimilið frá Íslandi og eru þá tímabundið ekki sjúkratryggðir innan almannatrygginga.
Hvað er bætt
Kostnað við sjúkrahúsvist að læknisráði.
Kostnað við almenna læknishjálp utan sjúkrahúsa.
Kostnaður við nauðsynlegar rannsóknir og aðgerðir hjá sérfræðingum.
Nauðsynleg lyf.
Kostnað vegna óhjákvæmilegs ferðakostnaðar læknis til tryggðs og flutningskostnaðar tryggðs í sjúkrahús.
Kostnað vegna hjúkrunar í heimahúsum vegna alvarlegra sjúkdóma eða slysa sem eru innan bótasviðs tryggingarinnar enda komi heimalega í stað sjúkrahúsvistar.
Hvað er ekki bætt
Kostnað sem er bótaskyldur samkvæmt lögum um sjúkratryggingar eða reglugerðum settum samkvæmt þeim.
Slys sem varð fyrir gildistöku tryggingarinnar.
Sjúkdóma sem sýndu einkenni áður en trygging tók gildi.
Tannlækningar eða lýtalækningar nema um sé að ræða nauðsynlegar bráðaaðgerðir vegna bótaskylds slyss eða sjúkdóms.
Kostnað vegna meðgöngu, fæðingarhjálpar eða sjúkdóma sem rekja má til meðgöngu eða fósturláts.
Sjúkdóma eða slys sem rekja má til neyslu áfengis, ávana- eða fíkniefna.
Tjón af völdum hryðjuverka vegna hvers konar líffræðilegra eða efnafræðilegra áhrifa og/eða eitrunar.
Kostnað vegna ryskinga eða þátttöku í refsiverðum verknaði.
Vegna slysa sem verða í keppni í hvers konar íþróttum eða við æfingar til undirbúnings fyrir keppni í hvers konar íþróttum.
Eru einhverjar takmarkanir eða varúðarreglur?
Skýri tryggður sviksamlega frá eða leyni atvikum er skipta máli um ábyrgð Varðar, glatar hann rétti sínum.
Tryggðum ber að fylgja varúðarreglum Varðar.
tTryggðum ber að kynna sér skilmála tryggingarinnar.
Hvar gildir tryggingin?
Tryggingin gildir á Íslandi.
Hverjar eru helstu skyldur þess tryggða?
Veita allar nauðsynlegar upplýsingar, hvort sem er við endurnýjun, breytingar á tryggingunni eða við tjónstilkynningu.
Tilkynna um tjón við fyrsta hentugleika og eigi síðar en innan árs frá tjónsatburði.
Greiða iðgjald tryggingarinnar innan 60 daga frá gildistöku, ella fellur tryggingin úr gildi.
Hvenær og hvernig er greitt fyrir trygginguna?
Iðgjöld tryggingarinnar ber að greiða áður en tryggingin tekur gildi. Hægt er að greiða með kreditkorti eða millifærslu.
Hvenær hefst tryggingarverndin og hvernig lýkur henni?
Tryggingin gildir í 6 mánuði frá útgáfu og framlengist ekki sjálfkrafa eftir það tímabil.