Vörður hefur undanfarna daga unnið hörðum höndum að aðgerðum til handa viðskiptavinum vegna þess fordæmalausa ástands sem kórónuveirufaraldurinn veldur. Aðgerðirnar verða kynntar viðskiptavinum næstu daga.

Efnahagslegar afleiðingar faraldursins eru án allrar hliðstæðu og ógnar hann fjárhagslegu öryggi margra. Stjórnvöld hafa hrundið af stað umfangsmiklum aðgerðum til að koma í veg fyrir að fólk missi vinnuna eða að fyrirtæki fari í þrot. Aðgerðirnar eiga einnig að styðja við og verja lífsafkomu fólksins í landinu. Sveitarfélög og fyrirtæki hafa lagt hönd á plóg með stjórnvöldum og kynnt aðgerðir í sama tilgangi. Það er í anda samfélagslegrar ábyrgðar Varðar að gera slíkt hið sama gagnvart sínum viðskiptavinum.

Það sem skiptir okkur þó mestu er heilsa okkar og þeirra sem okkur þykir vænt um. Þess vegna skiptir öllu máli að allt sé gert til að stemma stigu við útbreiðslu veirunnar og tryggja að heilbrigðiskerfið geti hlúð að þeim sem þess þurfa. Þar getum við öll lagst á árarnar og farið eftir fyrirmælum yfirvalda um sóttvarnir. Því hvetjum við viðskiptavini og aðra að „hlýða Víði“ áfram næstu vikurnar og ferðast innanhúss um páskana.