Vörður

fréttir -

19. mar 2020

Ferðatryggingar, ferðalög og COVID-19

Við höfum dregið saman helstu upplýsingar um ferðatryggingar og COVID-19. Hver og einn getur gert ýmislegt til að forðast smit og draga úr útbreiðslu veirunnar. Mikilvægt er að allir fari eftir leiðbeiningum sóttvarnarlæknis sem finna má á vef Landlæknisembættisins. Við hvetjum þig að kynna þér upplýsingarnar.

Íslensk stjórnvöld hafa ekki sett bann við ferðalögum til landa þar sem COVID-19 veiran hefur greinst en landlæknir mælir með að sleppa ónauðsynlegum ferðalögum til skilgreindra áhættusvæða þar sem COVID-19 smit eru staðfest og hafa breiðst út.

Einstaklingar, með búsetu á Íslandi, sem hafa verið á skilgreindum áhættusvæðum og snúa heim eru hvattir til að fylgja tilmælum landlæknis og Almannavarna er varðar sóttkví eftir að þeir hafa yfirgefið skilgreind áhættusvæði, sjá leiðbeiningar til einstaklinga í sóttkví á vef landlæknis. Ef þeir fá einkenni frá öndunarfærum, sérstaklega með hita, skulu þeir hafa samband við Læknavaktina í síma 1700 eða sína heilsugæslu símleiðis en ekki mæta óboðaðir á sjúklingamóttökur.

Hér fyrir neðan má finna upplýsingar varðandi ferðatryggingar Varðar og kreditkort Arion banka og Landsbankans og COVID-19. Ef þú finnur ekki svarið sem þú leitar að bendum við þér á að hafa samband við okkur í síma 514-1000, í gegnum netfangið vordur@vordur.is eða í netspjalli á vef Varðar: www.vordur.is

Hver er munurinn á forföllum og ferðarofi?

  • Forföll eiga við ef þú hættir við ferð vegna veikinda eða slyss áður en hún hefst og þú ert enn á Íslandi eða dvalarlandi þínu.

  • Ferðarof er ef þú þarf að rjúfa ferð sem er þegar hafin, þ.e. þú ert staddur erlendis og þarf að komast til Íslands vegna alvarlega veikindi ættingja eða andláts á Íslandi eða vegna verulegs eignartjóns.

Ef ég er á leið utan...

  • og það er búið að aflýsa fluginu mínu, er það bætt?  Ef flugfélag aflýsir fyrirhuguðu flugi á flugfélagið að endurgreiða þér flugmiðann að fullu. Bendum við þér á að hafa samband við flugfélagið þitt varðandi endurgreiðslu. Athugaðu að bið eftir svörum hjá flugfélögum getur verið löng.  

  • í pakkaferð sem keypt var í gegnum ferðaskrifstofu og kemst ekki vegna lokunar á áfangastað, er það bætt?  Nei, því miður. Pakkaferðir bætast ekki úr forfallatryggingu Varðar eða kreditkorta Arion banka eða Landsbankans þar sem þær eiga að bætast að fullu frá ferðsala á grundvalli laga um pakkaferðir. Sjá nánar: 

  • og kemst ekki í ferðina þar sem þarlend yfirvöld hafa sett ferðabann/lokað landamærum, er það bætt? Ef yfirvöld hafa lokað áfangastað eða þínu heimalandi vegna sóttvarna og flugfélagið aflýsir fyrirhuguðu flugi á flugfélagið að bæta þér flugið. Athugaðu að bið eftir svörum hjá flugfélögum getur verið löng. Varðandi annan kostnaður eins og hótel og/eða bílaleigubíll er leitað fyrst til þeirra þjónustuaðila, hótel og/eða bílaleigubíll afbókað og sótt um endurgreiðslu. Ef ekki fæst allur kostnaður endurgreiddur vegna hótels og/eða bílaleigubíls greiðast bætur úr forfallatryggingu Varðar og kreditkorta Arion banka og Landsbankans. Aðeins er bættur sá hluti sem ekki fékkst endurgreiddur, skv. skilmála hverrar tryggingar fyrir sig. Þegar að þær upplýsingar liggja fyrir er hægt að tilkynna tjónið inn á www.vordur.is og skila inn viðeigandi gögnum. 

  • og er óviss um hvað ferðabann þýðir og hvort þarlend yfirvöld hafi lokað landinu fyrir ferðamönnum, hvert á ég að leita? Ferðabann er þegar yfirvöld viðkomandi lands loka fyrir komur ferðamanna (opinber höft). Athugaðu þó að ferðatakmarkanir geta verið mismunandi milli landa. Opinber höft og ferðabann geta breyst mjög skyndilega. Við bendum þér á að ef þú átt ekki flug á allra næstu dögum að hafa frekar samband við ferðasala þegar nær dregur flugi. Við mælum með að þú kynnir þér eftirfarandi heimasíður varðandi ferðabönn og lokun á landamærum:

  • og þarlend yfirvöld hafa sett útgöngubann, er það bætt? Ef yfirvöld þess lands hafa sett útgöngubann en ekki ferðabann eða lokað landamærum og þú vilt ekki fara í fyrirhugað ferð vegna þess, er því miður ekki hægt að sækja í forfallatryggingu Varðar eða kreditkorta Arion banka og Landsbankans.

  • get ég sótt í forfallatryggingu Varðar og/eða kreditkorta Arion banka og Landsbankans ef ferðin mín er til skilgreindra svæða með mikla smitáhættu skv. landlækni? Nei því miður. Aðeins er hægt að sækja í forfallatrygginguna ef yfirvöld hafa lokað áfangastað eða þínu heimalandi vegna sóttvarna.

  • og vil hætta við ferðina vegna mögulegrar smithættu, er það bætt? Nei því miður, en við bendum þér á að leita til þinnar ferðaskrifstofu/flugfélags og kanna rétt þinn þar.

  • og hef fengið ráðleggingar frá mínum lækni að hætta við ferðina vegna undirliggjandi sjúkómdóms, er það bætt? Nei því miður, ekki fást greiddar bætur úr forfallatryggingu Varðar eða kreditkorta Arion banka og Landsbankans vegna breytinga á ferð vegna undirliggjandi sjúkdóms. Við hvetjum þig þó að huga að eigin heilsu og fylgja fyrirmælum landlæknis varðandi ferðalög, sjá leiðbeiningar fyrir einstaklinga með áhættuþætti.

  • og flugfélagið sem ég á fyrirhugaða ferð með fer í rekstrarstöðvun eða gjaldþrot, get ég sótt í forfallatryggingu Varðar eða kreditkorta Arion banka og Landsbankans? Nei, því miður, ekki eru bætt tjón farþega vegna fjárhagserfiðleika eða gjaldþrots flugrekanda eða annarra slíkra aðila sem annast farþegaflutninga. Frekari upplýsingar má finna á heimasíðu Samgöngustofu. Þar má finna umfjöllun um möguleika á endurgreiðslu, ýmist í gegnum kreditkortafyrirtæki eða ferðaskrifstofu.

Ef ég er á ferðalagi erlendis...

  • og staðurinn sem ég er á er settur í sóttkví og ég get ekki haldið ferðalaginu áfram vegna COVID-19 veirunnar, er það bætt? Ferðatryggingar Varðar og kortatryggingar Arion banka og Landsbankans ná ekki yfir þann auka kostnað sem kann að skapast við þær aðstæður.

  • og ég veikist af COVID-19 veirunni og get ekki haldið ferðalaginu áfram vegna sóttkvíar, er það bætt? Erlendur sjúkrakostnaður og aukinn kostnaður sem kann að skapast vegna veikinda er bættur úr ferðatryggingum Varðar og kortatryggingum Arion banka og Landsbankans, skv. skilmálum hverrar tryggingar fyrir sig.

  • og vil koma fyrr heim til að forðast smit, er það bætt? Nei því miður, hvorki fæst ferðin endurgreidd né aukinn kostnaður vegna nýs flugs.

  • og þarf að flýta heimför vegna lokunar á gististað, landi eða því svæði sem ég er á, er það bætt? Nei, því miður, hvorki fæst kostnaður við nýtt flug eða breytingu á flugi endurgreiddur.

Leiðbeiningar til almennings frá Land­læknisembætt­inu.

  • Handhreinsun og hreinlæti kringum augu, nef og munn ásamt öruggri meðhöndlun fæðu eru lykilatriði til að forðast smit og fækka smitleiðum í þeim tilgangi að draga úr líkum á alvarlegum veikindum.

  • Kórónaveiran Novel (COVID-19) hagar sér í sumu eins og inflúensa, einkenni eru svipuð og smitleiðir áþekkar.

  • Einkenni líkjast helst inflúensusýkingu, hósti, hiti, bein- og vöðvaverkir, þreyta o.s.frv. Kórónaveiran Novel getur einnig valdið alvarlegum veikindum með neðri öndunarfærasýkingum og lungnabólgu, sem koma oft fram sem öndunarerfiðleikar á 4.-8. degi veikinda.

  • Ef einstaklingar finna fyrir veikindum er þeim bent á að hringja í síma 1700 (fyrir erlend símanúmar +354 544-4113) varðandi nánari upplýsingar og hvernig þeir eigi að nálgast heilbrigðiskerfið.

  • Þessir einstaklingar eru sérstaklega beðnir um að mæta ekki á bráðamóttöku sjúkrahúsa eða á heilsugæslustöðvar nema að fengnum ráðleggingum í síma.

Gagnlegar upplýsingar varðandi flug, ferðalög og COViD-19: